Eldgömul Rúmfatalagers-kommóða fær ný föt ;-)

Hæhæ elsku fallega fólk!

Mikið er nú langt síðan ég hef skrifað eitthvað hér inn! En nú hlýt ég að fara að standa mig örlítið betur í þessu öllu saman því ég er loksins búin að skila lokaritgerðinni minni (maður þarf víst að forgangsraða) og á bara tvö próf eftir!

Nú þegar ég fékk loksins smá stund milli stríða ákvað ég að taka elsku gömlu rúmfatalagers-kommóðuna mína og klæða hana í ný föt. Mig langaði svo að veggfóðra hana framan á skúffunum en tímdi ekki að kaupa heila veggfóðursrúllu sem ég myndi svo bara kannski nota brotabrot af. Þar sem ég dey nú sjaldnast ráðalaus ákvað ég að finna mynd af einhverju fallegu veggfóðri, svona damask mynstur og prenta það út á nokkur venjuleg A4 blöð.

Svo tók ég fína Europris decoupage límlakkið mitt (virkar eins og Modpodge) og bar það aftan á eitt blaðið

Svo bara skellti ég blaðinu á efstu skúffuna til að prufa (sko auðvitað eftir að ég var búin að taka höldurnar af)

Strauk svo varlega yfir allt með plastsköfu sem ég átti til þess að losna við loftbólur undan pappírnum

... og viti menn og konur... það bara svínvirkaði :-D Svo skar ég bara til næsta blað til þess að láta mynstrið passa og límdi það svo líka á

...og svo koll af kolli þangað til ég var búin að gera eina skúffu pappírsklædda og fína. Svo penslaði ég yfir allt "veggfóðrið" með Eurpris Decoupage límlakkinu mínu og þá var fyrsta skúffan tilbúin!

Svo þegar ég var búin að pappírsklæða allar skúffurnar, þá ákvað ég að ráðast í það að mála greyið því ekki gat ég látið hana vera svona á litinn, það passar bara ekki við nýju fötin hennar ;-)
Fyrsta skref var auðvitað að pússa aðeins yfir hana svo að grunnurinn festist betur

Svo var þessi elska grunnuð með hvítri mattri málningu og svo máluð með háglans Flugger málningu. Hún þurfti nokkrar umferðir en það var þess virði því svona lítur gellan út núna:

Er hún ekki orðin falleg? Það finnst mér ;-) Svo er bara spurning hvort ég eigi ekki að fjárfesta í nýjum höldum á elskuna því þessar rúmfó höldur eru eiginlega bara ekki nógu fancy fyrir gelluna lengur ;-)

Kíki í Sirku á morgun (er hún opin á sunnudögum?) og athuga með nýjar höldur!

Bless í bili fríða fólk! Vona að þið hafið ekki gefist upp á því að bíða eftir mér allan þennan tíma.
Þangað til næst...take care

My Stuff - Kertin hennar Þórdísar Þorleifs

Ég má til með að sýna ykkur kertin hennar Þórdísar Þorleifs My Stuff ef þið vitið ekki nú þegar hvaða kerti ég á við :)
Kertin eru svo æðisleg með vintage myndum gerð með sérstakri aðferð svo að þegar þau brenna þá verður svona hólkur eftir utan um kertið, þ.e. myndin brennur ekki með og kertið helst fallegt allan brennslutímann! Talandi um brennslutímann þá endast kertin hennar mjög lengi líka :)

Svona litu jólakertin út síðustu jól:

Fallegri jólakerti hef ég aldrei séð!

Þessi kerti hér eru ekki síðri:

Eintóm fegurð!

Nú er Þórdís byrjuð að undirbúa sig fyrir fermingavertíðina og ég hlakka mikið til að sjá nýjustu kertin hennar, en þið? ;-)

xoxo

Duck egg blue pælingar og hitt og þetta

Hæhæ Aua hér ;)
Við dömurnar erum mikið búnar að dást að retro/vintage lit sem kallast Duck egg blue eða andareggja bláum sem við fjölluðum um í þessari færslu HÉR fyrir einhverju síðan.
Semsagt andareggja blár:

Það er þessi blágrængrái "skítugi" litur sem er svo guðdómlega fallegur! Fölur eða aðeins sterkari litur, allir tónarnir eru æðislega shabby, retro :)

Sjáiði td. þetta æðislega eldhús í duck egg blue:

Ótrúlega flott!

Ég ákvað að gera heiðarlega tilraun til þess að útvega mér svona andareggjabláa málningu. Ég byrjaði á því að spyrjast fyrir um þennan lit í helstu málningaverslunum en enginn kannaðist sérstaklega við þennan lit en þeir reyndu eins og þeir gátu að sýna mér eitthvað í líkingu við litinn en enginn var eins og ég var að meina.
Ég varð víst að reyna að finna andareggjabláan hlut sem ég gæti svo látið skanna inn fyrir mig og blanda sérstaklega. Ég fann könnu í Europris sem er að ég tel tónn af andareggjabláum og lét skanna hana inn og blanda handa mér málningu. Liturinn kom alveg fallega út en hefði mátt vera aðeins móskulegri, meiri grátóna og fölari eða svona "skítugri" ef þið skiljið mig ;)
Ég prufaði að mála gamla tréramma sem ég átti og tréhjörtu til þess að sjá hvernig þessi litur kæmi út:
Fyrir:

Eftir:
Málaði fyrst með brúnu, svo hvítu og loks bláu og pússaði yfir með sandpappír fyrir slitið look:

Þetta er ekki alveg liturinn sem ég var að leita eftir en fallega retro litur samt :) mætti vera móskulegri.

Ég er að hugsa um að stimpla á þessi hjörtu með bökunarpappírsaðferðinni hennar Helgu :)

Þó að liturinn á málningunni hafi ekki verið alveg réttur þá gefumst við ekkert upp í duck egg blue leitinni, þessi litur var góð byrjun en ég læt blanda móskulegri lit næst.

En að allt öðru, hafið þið séð uglu púðana frá Owl factory ?

Þær eru svo sætar þessar uglur, enda er að ganga yfir ugluæði í interior heimum þessi misserin!
Ég fann þessar hérna fallegu serviettur í Tiger um daginn:

Tók lítinn blindramma, Modpodge límlakk og ugluservíettu og Modpodge-aði myndina á rammann:

Flott mynd í barnaherbergið eða bara hvar sem er :)

og talandi um flottar uglur þá smíðaði eldri dóttir mín þessa hérna ofursætu uglu handa yngri systur sinni:

Þvílík krúttugla!

...og talandi um Modpodge límlakkið fræga þá Modpodge-aði ég englamynd á stífan pappír og bjó til svona tag:

Franskrómantískt tag til að setja á gjafir eða bara hengja á eitthvað heima til skrauts.

Modpodge-aðar myndir á glerkrukkur og flöskur:

Litla flaskan sómir sér bara vel á bakkanum inní stofu:

Takið eftir kórónu kertastjakanum :)

Jæja, best að halda áfram að stúdera duck egg blue litinn og finna hárréttu blönduna ;)
Bestu kveðjur, Aua.

Enn meiri tilraunastarfsemi

Halló allir og kærar þakkir fyrir viðbrögðin við síðustu færslu og öll hrósin! Mikið þykir mér vænt um þegar þið kíkkið hingað inn og ekki er verra að fá komment :-) Það er svo skemmtilegt að sjá hvað margir eru í svipuðum hugleiðingum og ég, það hvetur mig áfram í því að halda áfram að blogga og brasa ;-)

Jæja ég gat auðvitað ekki hætt að tilraunast með það að "transfera" með áprentuðum bökunarpappír því það er svo gaman þegar maður er búinn að uppgötva eitthvað nýtt og sniðugt!
Ég keypti stól í Fjölsmiðjunni á Akureyri einhverntíman fyrir jólin á heilar 700 kr!!
Fjölsmiðjan er einskonar vinnuþjálfun fyrir ungt fólk, 16-24 ára, sem stendur á krossgötum. Þarna er oft hægt að gera stórgóð kaup á gömlum húsgögnum sem maður getur svo skellt í makeover! Svo er maður að styrkja unga fólkið í leiðinni sem er bara bónus :-)
Ég semsagt rakst á þennan ágæta stól hjá þeim og tók hann með mér heim fyrir 700kr.

Ég pússaði hann upp og málaði hann hvítan með mattri innanhússmálningu:

Valdi mér svo eitthvað skemmtilegt quote til að prenta á bökunarpappírinn, prentaði það út og skellti því á miðja setuna á stólnum og þrýsti vel á alla stafina svo að þeir myndu nú færast almennilega yfir á stólinn.
Það tókst mjög vel nema mig langaði að hafa stafina aðeins skarpari svo ég fyllti pínu upp í þá með svörtum fíngerðum marker-penna.
Svo langaði mig að stimpla einhverja fallega mynd á miðspítuna á stólbakinu og það tókst alveg prýðilega líka. Síðan spreyaði ég yfir allan stólinn með hálfmöttu lakki til þess að verja hann. Svona lítur svo stóllinn út í dag ;-)

...og svo nærmynd af quote-inu

Þessi stóll á svo að fara í forstofuna mína og mun sóma sér vel þar :-)
Bestu kveðjur í bili,

Tilraunir eru skemmtilegar! Sumar heppnast en aðrar ekki ;-)

Jæja, ég er búin að vera að tilraunast með kerti, Europris Modpodge (sem heitir decoupage lim), prentarann minn, bökunarpappír og ljósmyndapappír, pappírsdúllur, bakkann minn hvíta... já og vatn! Ég er öll útötuð í bleki á höndunum, aum í puttunum og það er bökunarpappír fastur í prentaranum mínum! (eiginmaðurinn lagar það í fyrramálið).
Fyrsta tilraunin var að reyna að "transfer-a" mynd yfir á kerti með modpodge lakklími. Einhver aðferð sem ég fann á netinu sem var reyndar notuð á trébakka.... en hey ég ákvað að reyna að nota sömu aðferð á kertin mín. Ég semsagt byrjaði á að prenta út mynd sem mig langaði að hafa. Varð að vera svarthvít og ef texti þá þarf að prenta hann öfugan út svo hann komi rétt á hlutinn sem á að transfera á. Málaði svo kertið með Modpodge og skellti myndinni á nýmálað kertið og leyfði því að þorna.

Svo kom höfuðverkurinn! Ég þurfti að bleyta fingurna með vatni og nudda efstu lögin af pappírnum af með hringlaga hreyfingum þar til aðeins þunna fremsta lagið af pappírnum var eftir og sást vel í stafina. Þetta þarf að gera án þess að rífa modpodge-ið af i leiðinni eða rífa stafina í rugl... síðan leyfa þessu að þorna aftur og mála aftur yfir með modpodge og voilá, transferuð mynd á kertið! Nema hvað að kerti eru svo sleip og fitug að modpodge-ið nuddaðist alltaf svolítið með og reif stafina með sér út um allt. Ég reyndi og reyndi að láta þetta ganga en mér bara tókst það ekki nógu vel :-(
Þetta var það skásta sem kom út úr þessari tilraun:

En endaði með að rifna og aflagast og ég gafst upp!

En þá kom önnur fluga í hausinn á mér: Hvernig væri að prufa að prenta á bökunarpappír og stimpla með honum á eitthvað? Því sko sjáiði til, bökunarpappír er pínu vaxhúðaður svo að prentarablekið sogast ekki allt inn í hann heldur sest að mestu leyti ofaná bökunarpappírinn :-) Mér fannst ég orðin svo sjóuð eftir allar þessar tilraunir mínar að ég ákvað að nú skyldi eitthvað heppnast hjá mér!
Elsku hvíti bakkinn minn varð fyrsta fórnarlambið og ég sagði sjálfri mér að ég myndi þá bara mála yfir mistökin ef þetta gengi ekki.
Ég tók þessa hérna mynd:

...og prentaði spegilmynd af henni á bökunarpappír sem ég var búin að sníða eftir A4 blaði. Lagði það strax á bakkann og þrýsti vel á hvern einasta staf svo allt myndi nú stimplast vel. Vitið þið hvað?! Það barasta virkaði svona æðislega vel!!

Mér fannst ég hafa gert svo merka uppgötvun að ég tók nokkrar pappírsblúndur og ákvað að stimpla yfir á þær líka! ;-)

Langar ykkur að prufa? :-)
Ég ætla að gefa ykkur nokkrar svona öfugar myndir með texta sem er hægt að prenta út og stimpla á pappír, málaða slétta fleti, tré og örugglega ýmislegt annað. Munið bara að passa ykkur á því að bökunarpappírinn sé alveg sléttur áður en hann fer inn í prentarann því annars lendið þið í því eins og ég að hann festist í prentaranum :-/

Hvernig líst ykkur svo á þessar tilraunir hjá mér? ...og innilegar þakkir fyrir kommentin ykkar, mér þykir vænt um þau :-)
xoxo